Taldeak: TOXIKA!, XIKINKEI, UK-BILL eta BASANABASA.
Eguna: 2007/05/12
Lekua: Loiolako Gaztetxea (Donostia).
Jende-kopurua: 170 lagun inguru.

           Donostiako Piraten I. Musika Lehiaketaren lehenengo finalerdiaren harrera onaren ondotik, bigarrena ere antzekoa izango zela espero zen. Baina jende gutxiago hurbildu zen Loiolako gaztetxera. Beste behin ere, larunbatek izan ohi duten misterioa bete zen. Jendeak nahiago izaten du parranda egin edo beste leku batzuetara joatea. Izan ere, eskaintza zabalagoa izaten da asteburuko lehen egunean. Kontuak kontu, bigarren finalerdiak aurrera egin zuen falta ziren beste lau taldeekin: Lasarte, Donostia eta Pasai Donibaneko Toxika!, antzeko eremuetako Xikinkei, Añorgako Uk-Bill eta Donostiako Basanabasa. Aurreko astekoa baino aukera ezberdinagoa, anitzagoa. Bigarren finalerdiari erantzuteko 170 bat pertsona azaldu ziren gaztetxean. Hori bai, pixkanaka. Oraingo honetan ere, soinu probak behar bezala egin eta taldeek gustura afaldu ondoren taula gainean aritzeko ordua iritsi zen.

Toxika!
Gaueko hamarretarako zegoen zehaztua kontzertuen hasiera, baina Loiolako gaztetxea nahiko hutsa zegoela ikusita zertxobait atzeratu zen, Toxika! gaueko lehenengo taldearen jarduna. Hala ere, bost minutu pasa ondoren jende dezente inguratu eta Donostia eta inguruetako laukoteak beraien kontzertuari eman zioten hasiera. Lauko formatu sendoan, euskaraz abesturiko rock'n'rollaren doinuak entzun ziren gaztetxean. Marga abeslariaren ahots indartsuak berehala sortu zuen harridura (baita mugitzeko erak edo soinean zeraman jantzi berde toxikoak). Eragin aldetik askotan esan ohi dute Juliette & The Licks taldearen zaleak direla. Egia esan, ez dabiltza urrun. Dena dela, ziur Toxikako kideak ez direla Zientzologiako kideak, Lewis anderea bezala. Oro har, emanaldi ona eskaini zuten nahiz eta ahotsa apur bat galduta geratu. Soinua ez zen merezi zuten adinakoa izan. Hala ere, abestiz abesti beraien rock indartsu eta erritmikoa agerian utzi zuten. Honez gain, aipagarri da gitarra jotzaileak soka bat haustearekin batera Margak denbora aprobetxatu nahi izan zuela bakarkako jardun "berezi" batekin. Egia esan, abeslariaren jarrera izan zen Toxika taldearen kontzertutik nabarmendu zena.

Xikinkei
Ziztu bizian hurrengo kontzerturako egokitzapenak egin eta Xikinkei taldeko musikari gazteak gertu zeuden kontzertuari ekiteko. Egia esan, taldeek gazteek Euskal Herrian izaten duten harrera ona dagoeneko argi dagoen errealitate bat da. Izan ere, Xikinkei taldeak jende dezente ekarri zuen gaztetxera beraien kontzertua ikustera. Bistakoa da jarraitzaile talde fidel bat dutela. Giroa zerbait berotu ondoren, Xikinkei taldekoek beren lehen maketaren kaxa ireki eta tarteka abesti guztiak jotzen hasi ziren. Baita berriak ere. Publikoaren erantzuna erabatekoa izan zen. Soinua gehiegi hobetu ez bazen ere, kantu bakoitzarekin erantzun hobea izan zuten. Egia esan, musikari gazteek aurrera egiteko gogoa dutela erakutsi zuten. Hala ere, oraindik nabari da taldeak ez duela erabat erabaki musikalki zein bide hartuko duen. Denetarik aurki daiteke beraien abestietan. Hardcore melodiko eta punk-rockaren bitarteko oinarri bat, metal kutsua baterian, reggae pasarteak, ... Guzti hau euskaraz. Zelako kakanahastea! Baina onartu behar da nahasketaren emaitza nahiko entzungarria dela. Gainera guzti honi melodia itsaskorrak gehitzen badizkiogu emaitza diskoa bera baino borobilagoa da. Azken batean, Xikinkei taldeko lau kideek asmatu zuten Loiolako gaztetxean emandako kontzertuarekin eta modu berean eskertu zieten lagun guztiek. Nolanahi ere, lagun ez ziren askok ere gozatu zutela esan daiteke. Ikuskizun "mugituena" izan zen. Soka apurketak ere ez ziren faltan izan. Musika apur bat definituz gero, etorkizuna izan dezakete.

Uk-Bill
"Beteranoek" hazi nahi duen taldearen lekua hartu zuten eszenatokian. Uk-Bill taldekoek esperientziaren ikurra erakutsi zuten gaztetxean. Utikan, Asgarth eta Lauroba taldeetan irabazitako esperientzia lagun (azken bi taldeak momentuz martxan), Uk-Bill taldeko lau musikariek argi adierazi zuten zergatik jarraitzen duten musikaren munduan. Atsegin dutelako. Arrakasta ezagutu dute. Baita gainbehera ere. Baina hor jarraitzen duten musika egiten. Oraingo honetan, Rafa Cabeza musikari "mitikoak" rock'n'roll doinuetarantza bideratu du bere talde berria. Maketa aurki ateratzekoak dira eta bertako abestiak aurkezteko aprobetxatu zuten bigarren finalerdia. Hasieratik azpimarratu behar da Añorgakoek gaueko soinu garbiena izan zutela. Musikari bezala duten esperientziak ere lagundu zuen horretan. Bateratuta aritu ziren, abesti guztiekin betiko rock doinuak euskaraz transmititu nahian. Ordurako aretoa ez zegoen aurreko taldearekin bezain beteta, baina jendeak gustura jarraitu zuen beraien kontzertua. "Beteranoek" oraindik badute zer abestu.

Basanabasa
Finalerdiei amaiera orokorra emateko, lehiaketako proposamen berezienak hartu zuen oholtza. Azken boladan elektronikak gurean bizi duen hazkuntzaren adierazle den Basanabasa taldeak kolore ezberdina eman zion gauari. Irudi-sormena ilustrazio gisa erabiliz, Donostiako bikoteak garai berrietara egokitzen den egitasmoa jarri zuen martxan Loiolako gaztetxean. Beraien lehenengo emankizuna zen eta ikusitakoaren ondoren ziur ez dela azkena izango. Basanabasak elektronika oinarrian badu ere, fusioaren alde egiten du. Honela, irudi-sormenarekin batera soinu aldetik ere sormen eta nahasketari egiten dio lekua. Honela, Euskal Herriko musika tresna tradizionalak (alboka, txalaparta, dultzaina, ...) erabiltzen dituzte oinarri elektronikoak janzteko. Hala ere, zuzenean soilik txalaparta erabili zuten baina ziur aurrera begira beste hainbat musika tresna gaineratzen dituztela. Ikusikizunari dagokionez, onartu behar da honelako musikak hoztasuna dakarrela zentzu batean. Zuzenean soilik irudi-sormena ikusten denez apur bat hankamotz geratzen da proposamena. Soinu banda bat bezala entzuten da, ikusteko ez dagoelako benetan zirrara sortzen duen ezer. Baina honakoa betiko eztabaida litzateke. Azken batean, abesti ezberdin asko jo zituzten, gozaraztekoak eta denbora pasatzekoak. Gaztetxean geratzen den jende apurrak begi onez ikusi eta ondo pasa zuen. Hori bai, esan bezala, bistakoa zen beraien lehenengo emanaldia zela. Dudarik gabe, esperimentu berritzaile eta interesgarria.

           Honenbestez, Donostiako Piraten I. Musika Lehiaketa azken epaiaren zain geratu zen. Zortzi taldeak zuzeneko frogatik pasa ondoren orain epaimahaiak erabaki beharko du zein hiru taldek parte hartuko duten maiatzaren 26ko finalean. Ez da batere erraza izango erabakia, bai ordea hirugarren aldiz musika eta aldarrikapena gustuko dituen oro Loiolako gaztetxean biltzeko. Astebete baino zertxobait gehiago falta da final handira, bozkatu baino musika onak eta festa eder batek ez digu kalte egingo, ezta?

Inaxio Esnaola (07/05/15)
 

Taldeak: INSTEP, BRUTAL PLANET, FRIDA PIPOL eta SUPERTROOPER.
Eguna: 2007/05/04
Lekua: Loiolako Gaztetxea (Donostia).
Jende-kopurua: 200 lagun inguru.

           Donostiako Piraten I. Musika Lehiaketa martxoan abiatu bazen ere maiatzean garatuko da  zuzenekoen bitartez Loiolako gaztetxean. Atzo, epaimahaiak hautatutako zortzi taldeetatik lauk lehenengo finalerdian parte hartu zuten. Bertan izan ziren, Oiartzungo Instep, Lasarte eta Donostia bitarteko Brutal Planet, Oreretako Frida Pipol eta Donostiako Supertrooper taldeak. Ostirala izanik eta eguraldi kaskarra lagun, uste baino jende gutxiago espero zen. Hala ere, lehiaketak piztu duen interesa dela medio 200 bat pertsona bildu ziren Loiola auzoko gaztetxean. Gauza guztiak prestatu eta soinu probak egin ondoren, gaueko hamarrak aldean igo zen oholtzara gaueko lehen taldea.

Instep
Musika tresnak gertu, Oiartzungo boskotea musika lehiaketaren lehen finalerdiari hasiera emateaz arduratu zen. Gazteak izan arren, berehala egoki ziren eszenatokira eta "Frequently Asked Questions" lehen maketako abestiak jotzeari ekin zioten. Hasieratik agerian geratu zen Oiartzungo taldeak metal musikaren joera berriak atsegin dituela. Gitarra riff astun eta ahots urratuek borroka latza izan zuten noiz edo noiz azaltzen ziren melodia pasarteekin. Baita DJaren parte hartze kurioso (efektu eta saxo artean) eta bateria tekniko baten lanarekin ere. Ikus-entzuleek harretaz jarraitu zuten gazte hauen kontzertua. Ordurako, gaztetxea nahiko betea zegoen eta ondorioz Instep taldeko musikariak hazi egin ziren taula gainean. Gutxi gorabehera hiru ordu laurdeneko kontzertua eskaini zuten. Zinez interesgarria. Finalerdiei hasiera emateko modu egokia.

Brutal Planet
Ohiko aldaketa egin ondoren Brutal Planet taldearen txanda iritsi zen. Lasarte eta Donostiako musikariek osatutako taldeak doinu gogorren bidetik jarraitu zuen. Metal musika aldarri boskoteak indartsu hasi zuen bere emankizuna. Hori bai, aurrez ikusitakoarekin aldaketa nabarmen bat eman zen: neska bat zen abeslari eta gidaria. Honela, gitarra gogor eta bonbo bikoitzaren taupadek ahots garbi bezain deigarri bat zuten lagun. Dena dela, abeslariak arazoren bat zuen ahotsarekin eta noizbehinka dezente sufritu behar izan zuen. Bestalde, soinua ez zen guztiz bikaina izan lehenengo kantuetan, baina gerora dena hobetzen joan zen merezi zuten oreka lortu arte. Kontzertuan eskaini zituzten abestiak, laster aterako duten maketan entzun ahal izango dira. Kantu sendoak, metal kutsu nabari dutenak. Klasiko zein modernoak. Armenia aldeko bertsioren bat egiten ere ausartu ziren. Bitxia oso. Azken batean, beraien aukera ondo aprobetxatu eta zuzeneko intentsua eskaini zuten.

           Finalerdiaren erdialdera iritsita eta aldaketen denbora ondo erabiltzeko Donostiako Piratek bete dituzten bost urteak biltzen zituen argazki erakusketa jarri zuten gaztetxean. Honela, eztarriak asetu bitartean entretenitzeko aukera izan zuten ikus-entzuleek.

Frida Pipol
Gauak guztiz aurrera egin baino lehen Oreretatik zetorren Frida Pipol taldeak etenaldia hautsi zuen bere jardun ezberdina erakusteko. Ordura arte, doinu gogorrak izan ziren protagonista. Zazpi musikariz osatutako taldeak, berriz, kolore ezberdin bat eman zion finalerdiari. Jorratzen duten funky irekiak jendea dantzan jarri eta giro berezia sortu zuen Loiolako gaztetxean. Diskoteka klasikoenetan protagonista zen argien-bolak bere martxa hartu zuen erritmo dantzagarriekin bat egiteko. Beraien musika denen eskura zegoen. "Six Appeal" lehenengo maketan bildutako abesti gehienak jo zituzten eta ateratzear dauden "El Sarao" bigarrenaren aurrerapena entzuteko parada ere izan zen. Funky, groove, latino, bossa-nova, ... zer ez zuten nahastu Oreretakoek. Egia esan, baxu jotzaile harrigarri baten jardunarekin, haizezko musika tresnen eta teklatuaren bihurrikeriekin eta bi nesken ahots ederrarekin nahasketa polita lortu zuten. Soinu aldetik, aldiz, nahiko garbi entzun ahal izan ziren musika tresna guztiak. Finean, ikus-entzuleek oso ondo pasa zuten Frida Pipolen proposamen dantzagarriarekin.

Supertrooper
Eta lehenengo finalerdiari amaiera emateko Supertrooper taldekoek hartu zuten eszenatokia. Askotan gertatzen den bezala azkeneko taldeak jotzeko gogo berbera izan arren publiko eskasagoa izaten du. Laster izango ziren goizeko ordubiak eta 50 bat pertsonek jarraitzen zuten firme edo dagoeneko kolokan gaztetxean. Nolanahi ere, Donostiako boskotea energiaz beteta eta aurpegiak margotuta eman zion hasiera gaueko azken kontzertuari. Seikoteak lehenengo akordetik aurkeztu zuen bere proposamena: 70. hamarkadako hard rock lotsagabea, soul esentziarekin ahotsetan. Beraiek  horrela definitzen dute egiten duten musika eta zuzenean ere berretsi zuten. Gauean zehar ikusitako bide beretik, Supertrooper taldean ere emakumeen ahotsan izan ziren protagonista. Abestu eta antzezteaz arduratu ziren bi neskek, ezin hobeto erakutsi zuten oso ondo moldatzen direla. Melodietan ez zuten hutsik egin eta izaera nahiko makarra izan zuten abesti guztietan. Publikoaren aurrean, ordea, zertxobait inozoagoak izan ziren, lekuz kanpo zegoen jerga rock'n'roll zalea erabili zutelako. Gainontzean gaztetxean geratzen ziren apurrek bikain pasa zuten. Donostiarrek ere, aurki aterako dute beraien maketa eta zuzenean erakutsitakoaren ondoren argi dago kalitate handikoa izan zen. Ezusteko lotsagabea eta bikaina izan zen lehenengo finalerdiei ateak ixteko.

           Behin kontzertuak amaituta jende gehienak etxerako bidea hartu zuen. Aste osoa lan egiten pasa duenak ez du festarako gorputzaldi hoberena izaten. Donostiako Piratetako hainbat kidek ere amore eman behar izan zuten eta nekeak jota merezi zuten atsedenaren bila joan ziren. Hala ere, gaua ez zen guztiz amaitu. Peru DJak bere musika tresna martxan jarri eta Loiolako gaztetxean geratzen zirenei soinu banda bat jarri edo arrazoi bat eman zien trago bat edo bi (edo hainbat) hartzeko. Ez zen kexarik egon, beraz ondo pasa zutenaren seinale.

           Datorren larunbatean bigarren finalerdiaren ordua iritsiko da leku eta ordu berean. Lehenengora joan ez izanagatik damutzen direnek ez dute arrazoirik bigarrenera ez hurbiltzeko. Hortaz, hurrengo astean gehiago eta aukeran hobeto!

Inaxio Esnaola (07/05/05)