I. Musika Lehiaketa 2007

Aurtengo udaran  5. urtez  jarraian Aste Nagusia abordatzeko prest gara! 5. urtez  kalaberaren algara geure kaleetan zehar entzuteko gogo biziz, 5. urtez hodeiertzean jai herrikoien aldarria begiztatuz donostiarron badia bandera beltzez betetzeko asmo irmoaz, 5. urtez 200 kanoi eta ehunka gazteren indarrez hiri hau abordatzera gatoz jai eredutik hasita beste hiri eta bizi eredu herrikoi euskaldun eta sozialago  baten proiektuei  geure ekarpena eginaz, protesta eta jaia uztartuaz.

5 urte hauei so egitean, mugimendu honek emandako fruituak aurreikuspen guztiak gainditu dituela esateko moduan aurkitzen gara! Lehenengo urtean hamarnaka batzuk izan baginen ilusioz beterik gazte proiektu hau abiatu genuenak, urtez urte ehunka, eta hainbat momentutan milaka izan dira modu batean edo bestean pirata sentitu eta pirata gisara Aste Nagusian parte hartu dutenak. Ez hori bakarrik, gainera mugimendu honen oinarriak ezarri eta eraikitzeko garaian, oso presente izan ditugu Euskal Herrian jai herriko orok ezinbestean jaso eta eman beharreko balore eta eduki herritar zein aurrerakoiak. Hala ere eta oraindik orain ez da gure txalupa nahi dugun kaira iritsi , Egun Donostiak ez du Jai herrikoi oso batzuek antolatu eta gozatzeko aukera eta horixe da geure azken portua. Baina ez gara itsaso zabalen galduko, ezta itoko ere , aurrera segitzeko oihalari bultzatzen dion haizea badugu eta haize hori guztiok gara, pirata sentitzen garen horiek , egunez egun gehiago izango garenak.

Norabidea ere argi dugu, geure iparorratza inoiz baina zorrotzago darabilkigu, ezerk ez digu adierazten kontrakorik, argi eta garbi dugu PARTEHARTZEA dela jai herrikoi batzuk ahalbidetuko dituen tresna. Beraz aurtengo itsaso-kanpainarako geure leloa PARTEHARTZERUNTZ ABANT izango da, antolatuko dugun ekimen oro zentzu horretan ulertzeari garrantzi handia emanaz. Honezkero hasi gara lanean, eta erronka honi erantzuten dio, gaurko prentsaurrekoaren edukiak. Segidan aurkeztuko zaizuen Musika lehiaketak helburu zehatz batzuk ditu: Musika, jaiarekin hainbesteko harremana duen espresio kulturala erabiliaz, Donostia eta ingurutako talde gehi euren inguruan mugitzen diren koadrila eta gazteetara hurbildu nahi dugu. Euren moduan -kasu honetan musika eginaz eta joaz - geurekin bat egin dezaten. Hau da filosofia, hau da bidea gure ustez eta jakinarazi nahi dizuegu ekinbide musikal honetaz gain urtez urte, aurtendik hasita,  ahalik eta  gazte donostiar gehienekin bildu eta bat egiteko asmoa dugula, eurengana joaz, eurei entzunaz eta jai herrikoien helburura eurek gustuko duten modura atxikiz.

Aurki dugu Aste Nagusia geure artean, ziurtasun osoz aurten eta urtez urte pixka bat herrikoiagoa izango da, geure azken helburua erdietsi arte. Abordatzea, irrikitaldia, eskaintza musikala, herri-jolasak, etab. umorez , ironiaz eta protestaz beterik, norbanako eta gazte eragile ezberdinen presentzia eta inplikazioaz, eta hau dena PARTEHARTZEAREN itsas oihalean bilduta!!! Jaia baita herri honetan tristura eta negarra begitik kentzen digun haize tenpesta , jaia baita gizarte eredu berri baterantz eraldaketarako beste tresna garrantzitsu bat. Azkenik zorionak eman Donostiako Pirata guztiei, beraiei esker egungo jaiak zentzu herrikoiagoa duelako eta batez ere Aste Nagusia ezin uler litekeelako Donostiako Piratak gabe. Lorpen hori guztiona da! ZORIONAK ETA SEGI LANEAN! JAI HERRIKOIEN ALDE ABORDATZERA!

Donostiako Piratak